Kynntu þér stefnumálin

Smelltu hér

Málefni

Þetta eru helstu áherslur S-listans fyrir komandi sveitarstjórnarkosningar. Frekari stefnu varðandi málefni er að finna í fellivalmynd. 

XS fyrir samfélagið allt
#hraustsamfélag

Hraustar fjölskyldur
Lækkum skólamáltíðir leik og grunnskóla niður í 250 kr. strax næsta haust.
Við á S-listanum trúum á jöfnuð sem tæki til að gera allt samfélagið sterkara. Mikilvægt er að öll börn sitji við sama borð þegar kemur að næringu og fái tækifæri til að vaxa og dafna. Með þessari aðgerð færum við kostnað foreldra neðar og þetta kemur öllu svæðinu til góða þar sem þessi aðgerð teygir sig í alla leik- og grunnskóla Norðurþings.

Gerum Tún að félagsmiðstöð sem þjónustar sem flesta með fjölbreytta aðstöðu.
Til að samfélag verði hraust er mikilvægt að gefa öllum tækifæri til að nýta hæfileika sína og byggja verðu upp ungt fólk til að það finni sinn stað. Markmiðið er að í Túni verði aðstaða fyrir hverskonar tómstundalíf til dæmis í formi námskeiða, lista og félagsmiðstöð fyrir ungt fólk. Það er hægt að sjá fyrir sér að byggja upp í leiðinni aðstöðu fyrir Miðjuna og í framtíðinni skoða samlegð varðandi yfirfærslu barna úr leikskóla í grunnskóla.

  • Förum í átak til að laga leikvellina okkar. Börnin verða að geta leikið sér og einstaka foreldri getur þá skellt sér í aparóluna líka.
  • Aukum framlög til íþrótta- og æskulýðsmála t.d. með því að færa frístundakortið upp í 12.000 kr. og styrkjum afreksstarf. Lið eða einstaklingar sem keppa meðal þeirra bestu eru mikilvægar fyrirmyndir ungra íþróttamanna og frábær kynning á öflugu íþróttastarfi í samfélaginu.
  • Frítt í sund fyrir ellilífeyrisþega. Mikilvægt er að fólk á öllum aldri óháð efnahag geti stundað sundið enda mikil heilsubót.
  • Eflum sálfræðiþjónustu við skólabörn í Norðurþingi.
  • Kortleggjum hvar megi bæta aðgengismál fatlaðra og setjum upp aðgerðaáætlun, því það er nauðsynlegt að hraust samfélag geri öllum kleift að komast um.

Hraustir íbúar
Förum í stórfellda uppbyggingu við útivistarsvæðið við Höskuldsvatn. Sett verður upp skíðalyfta, hönnun hafin og byrjað á framkvæmdum.
Hraustar fjölskyldur þurfa svigrúm og aðstöðu til að stunda útivist og hreyfingu. Hreyfing er nauðsynleg bæði andlegri og líkamlegri heilsu og er okkar markmið að eftir að deiliskipulagsvinnu lýkur verði framkvæmdir settar í gang sem fyrst. Við viljum koma upp skíðalyftu og að áframhaldandi uppbygging fari svo fram eftir ákveðnum tímasettum skrefum á næstu árum í samvinnu við félagasamtök og hagaðila.

Við sjáum fyrir okkur svæði fyrir gönguskíði, snjósleða, gönguferðir, fjallahjólaferðir og hestaferðir svo að eitthvað sé nefnt. Mikilvægt er að hanna svæðið vel og huga vel að framkvæmd áður en farið er af stað því svæðið mun skipta máli um ókomna framtíð. Þetta markmið helst í hendur við Heilsueflandi samfélag.

  • Lögum gangstéttir með hjól í huga og ljúkum fyrir árslok 2019. Íbúar í öllum byggðakjörnum verða að geta komist um á fákunum sínum án þess að eiga stefnumót við 30 cm háan gangstéttarkant.
  • Sérskilgreinum hundasvæði. Hraustir hundaeigendur og hraustir hundar eru hverju samfélagi til góða.
  • Lögum göngu- og hjólastíginn út að Kaldbak sumarið 2018.
  • Byggjum upp strandblakaðstöðu á Húsavík í samráði við Blakdeild Völsungs
  • Við ætlum að setja á laggirnar Framtakssjóð íbúa upp á fimm milljónir. Ef íbúar vilja og hafa getu til að laga opinber svæði þá geta þeir sótt um styrk til að gera það.
  • Lögum kirkjutröppurnar niður á höfn sem allra fyrst.

Hraust atvinnulíf
Finnum leiðir til að styðja við ferðaþjónustuna og mörkum fastmótaðri atvinnustefnu
Strax árið 2018 er mikilvægt að stíga stór skref til að styðja við ferðaþjónustu á svæðinu því það er ljóst að halda verður áfram að sækja ferðamenn á svæðið, það gerist ekki af sjálfu sér. Húsavíkurstofa getur spilað stórt hlutverk hvað þetta varðar og því verður að finna henni hlutverk í þessari uppbyggingu.

Þegar horft er til þessara mála er einnig mikilvægt að til staðar sé stefna sem tekur á helstu atvinnuvegunum og hvar við viljum sjá okkur standa gagnvart þeim í framtíðinni. Mikilvægt er að uppbygging ferðaþjónustu sé í sátt við íbúa og að hlustað sé á umkvartanir þeirra og reynt að komast til móts við þær. Hraust atvinnulíf stuðlar að fjölbreytni í samfélaginu og afleiddri þjónustu sem annars er ekki til staðar.

  • Setjum 10 milljónir í uppbyggingu tjaldsvæða á Kópaskeri og Raufarhöfn strax á árinu 2018 og nútímavæða tjaldsvæðin.
  • Lækkum fasteignaskatt úr 0,58% í 0,48% á íbúðarhúsnæði og úr 1,65% í 1,55% á atvinnuhúsnæði.
  • Bundið slitlag við Reykjaheiðarveg. Samfélag verður að hafa hrausta vegi.
  • Setjum þriggja flokka ruslatunnur á almenningssvæði í alla byggðakjarna strax í sumar. Hraust samfélag er snyrtilegt og umhverfisvænt.
  • Eflum menningarsjóð Norðurþings með það markmið að fjölga menningarviðburðum. Hægt verður að sækja í sjóðinn til að tryggja að viðburður fari ekki í tap standi miðasala ekki undir sér. Setjum 2,5 milljónir í sjóðinn 2018 og endurskoðum í lok árs.

 

 

Begin typing your search above and press enter to search. Press ESC to cancel.

Back To Top